Журналист Самарқанд шаҳрида фаолият олиб бораётган бир қатор тўйхона ва ресторанлардаги ҳолатни ўрганди. Унда ҳаётга татбиқ этилиши лозим бўлган тавсия ва тартибларга тўйхона раҳбарлари бефарқлик билан қараётганлиги маълум бўлди. Бу ҳақда “Зарафшон” газетасининг интернетдаги сайтида ёзилган.

Жумладан, Самарқанд шаҳридаги «Баҳор» тўйхонаси бир неча йиллардан бери фаолият кўрсатаётганлигига қарамасдан, бинонинг лойиҳа ва кадастр ҳужжатлари, экспертиза хулосалари йўқлиги аниқланган.

Маълум бўлишича, ушбу тўйхона бинода ноқонуний равишда газ сўриб олиш мосламаси ўрнатилган. Ошхонада эса синовдан ўтказилмаган маиший газ баллонларидан фойдаланилмоқда. Кузатув камераси ва терминал аппарати ишламайди.

«Хазора» тўйхонасида ҳам терминал аппарати ўрнатилмаган. Бинода ёнғиндан хабар берувчи автоматик мосламалар йўқ, табиий газдан эса резина шланглар орқали фойдаланиб келиняпти. Ошхона санитария-гигиена талабларига мутлақо жавоб бермайди", дейилади хабарда.

«Золотой дворец», «Феруза» тўйхоналарида қўлбола газ сўриб олиш мосламаларидан ноқонуний тартибда фойдаланиб келинаётганлиги аниқланиб, шаҳар газ филиалининг масъул ходимлари томонидан тегишли тартибда расмийлаштирилган ва тармоқдан узиб қўйилган. Ошпазлар махсус иш кийим билан таъминланмаган, хизматчиларга меҳнат шартномаси расмийлаштирилмаган, уларда тиббий кўрик дафтарчалари йўқлиги қайд этилган.

"Ошхоналар санитария-гигиена қоида ва талабларига мутлақо жавоб бермайди. Чиқиндилардан тозаланмаган, тоза ичимлик суви ва оқова тармоғига уланмаган, носоз электр тарқатиш қутилари ва электр розеткалари, хавфли маиший газ баллондан фойдаланиб келинган", деб ёзади журналист.