Баҳрайн ҳамда Ўзбекистон миллий терма жамоалари ўртасидаги учрашув олдидан ташкил қилинган матбуот-анжуманида Ўзбекистон миллий терма жамоаси бош мураббийи Самвел Бабаян ҳамда терма жамоа ҳужумчиси Марат Бикмаев иштирокида матбуот анжумани ўтказилди. Бу ҳақда терма жамоанинг матбуот хизмати бош котиби Санжар Ризаев ўз блогида маълум қилган.

Дастлаб Бабаян журналистларнинг саволларига жавоб қайтарган.

"Барча журналистлар ва ҳамкасбларимизга хайрли оқшом тилайман. Мен Баҳрайнга биринчи марта келганим йўқ. Яна бир марта шу ерга келганимдан хурсандман. Бу ерга клубда фаолият олиб борган пайтларимда ҳам келгандим. Манама шаҳри йилдан йилга чирой очиб ормоқда", дейди у кириш сўзлари ўрнида.

"Эртанги ўйин ҳақида гапирадиган бўлсам, эртага бизни осон бўлмаган ва кучли мураббийи бор бўлган рақиб кутмоқда. Бир қатор ажойиб футболчиларга эга бўлган мазкур жамоага қарши майдонга чиқамиз. Биз учун ҳар бир ўйин максимал даражадаги эътиборни талаб қилади. Бу менинг учинчи расмий ўйиним. Эртага ўзимизнинг энг яхши футболимизни кўрсатишга ҳаракат қиламиз", дейди Бабаян Ўзбекистон термасининг эртанги ўйиндаги имкониятлари бўйича берилган саволаг жавобан.

Агар икки жамоанинг ўзаро ўйинларига эътибор қаратадиган бўлсак, Ўзбекистон расмий ўйинларда деярли зафар қучмаган. Нима деб ўйлайсиз, эртага тарих ўзгариши мумкинми?

"Футбол ажойиб спорт тури ҳисобланади. Ўйлашимча, ҳар бир нарсанинг охири бор. Умид қиламанки, эртага ўзаро ўйинлардаги омадсиз натижаларимизга барҳам берилади", дея жавоб қайтарган мураббий Ўзбекистон терма жамоасининг Баҳрайн терма жамоасига қарши расмий ўйинларда кўпинча мағлуб бўлиб келгани эслатилган саволга жавоб бериш асносида.

Шунингдек, терма жамоа ҳужумчиси Марат Бикмаев терма жамоа эртанги ўйинга тайёрлиги, футболчиларда ҳамиша жанговар руҳ ҳукмрон бўлгани, терма жамоа аъзоларининг жисмоний ҳолати ҳам жойида эканлиги ҳақида гапирган.

"Олдимизда жиддий ўйин турибди ва вазифа ғалаба қозонидан иборат. Жамоадошларим 100 фоиз куч билан ҳаракат қилишади", дея ишонч билдирган у.