Twitter микроблог хизмати реал вақтдаги энг муҳим воқеиликларни бериб борувчи янги Moments («Ҳодисалар») функциясини ишга туширмоқчи. Бу ҳақда «Газета.ru» компания пресс-релизига таяниб хабар бермоқда.

Янги функция ёрдамида фойдаланувчилар энг муҳим ва оммабоп воқеалар билан танишиб бориши ва унинг қай йўсинда якун топишини кузатиш имкониятига эга бўлишлари мумкин бўлади. Фойдаланувчилар шу каби «ҳодиса»га обуна бўлишлари ва ушбу тадбирнинг кечишини ўз ленталарида кузатиб боришлари мумкин бўлади. Воқеа тафсилотлари якунлангач, мазкур вазият ҳам ўз-ўзидан йўқолиб кетади.

«Ҳодисалар» хизмати Twitter билан ҳамкорликни йўлга қўйган Bleacher Report, Buzzfeed, Entertainment Weekly, Fox News, Getty Images, Mashable, MLB, NASA, New York Times, Vogue ва Washington Post каби амалга оширилади. Тез орада Twitter бу борадаги ҳамкорлари сони кенгайиши кутилмоқда. Ҳозирда мазкур хизмат АҚШ учун ишламоқда. Тез орада хизмат бошқа мамлакатлар учун ва шунингдек Android ва iOS операцион дастурлари учун ҳам ишлашни бошлайди.

Маълумот ўрнида таъкидлаб ўтиш жоиз, янги функция Twitter асосчиларидан бири Жек Дорсининг ижтимоий тармоқнинг директори сифатида тайинланганидан бир сутка ўтиб ишга туширилгани маълум қилинди.