Америка Қўшма Штатлар Адлия вазирлиги яқин вақтлар ичида зўравонликка қўл урмаган ҳолда жиноят содир этиб, жазони ижро этаётган бир неча минг кишини муддатидан олдин қамоқхоналардан чиқаришга тайёргарлик кўрмоқда.

30 октябрдан 2 ноябрга қадар федерал қамоқхоналардан 6 мингга қадар киши озод этилиши мумкин, дея ёзмоқда Washington Post.

Қайд этилишича, мазкур қарор сўнгги ўн йилларда узоқ муддатли қамоқ жазосига ҳукм қилинган гиёҳванд моддаларга қарам кишиларга нисбатан адолатнинг тикланишига хизмат қилади. Шунингдек, муайян шартлар эвазига муддатидан олдин озод қилиш орқали қарийб тўлган қамоқхоналар бўшатиб олинади.

Барча жараёнлар 46 минг нафаргача кишини қамраб олиши мумкин, уларнинг 6 минг нафари 2015 йил кузида озод қилинса, яна 8,5 минг киши келгуси йил кузигача эркинликка чиқарилади.

Қайд этилишича, Адлия вазирлиги прокурорларга зўравонликка асосланмаган наркотиклар билан боғлиқ жиноятларни содир этган шахсларга нисбатан қатъий жазоларни қўлламасликни топширган. Табиийки, бу буйруқ уюшган жиноий гуруҳ ва наркокартеллар аъзоларига тегишли эмас.

Ҳибсда сақланаётганлар озодликка чиқиш учун бу ҳақда қарор қабул қилинганидан сўнг маъмуриятга билдиришнома топширишлари лозим.

Ушбу ташаббусга эътироз билдириб, жиноятлар сони ортиши мумкинлигидан ҳайиқаётганларга жавоб тариқасида Адлия вазирлиги собиқ жиноятчилар доимий назорат остида бўлиши, уларнинг учдан бир қисмига яқини эса ўз ватанларига қайтариб юборилишини маълум қилди.