Кўпчилик томошабинлар орасида оммалашиб кетган, турк султони Сулаймон фарзандларининг аянчли тақдири ҳақидаги "Муҳташам юз йил" турк сериалининг мухлислари ҳали кўз ёшларини артиб улгурмасидан Туркияда сериалнинг давоми – "Муҳташам юз йил. Кёсем" сериалини суратга олиш ишлари бошланди.

Янги сериал томошабинларни султон Сулаймондан юз йилдан кейин Усмонийлар империясига ҳукмронлик қилган султон Аҳмад I давридаги воқеалар билан таништиради. Султон Сулаймоннинг биринчи қонуний рафиқаси бўлган Александра-Хуррам тарихининг оламшумул муваффақиятидан кейин сериал продюсери Темур Савжи экранда Аҳмад Биринчининг рафиқаси Кёсемнинг образини гавдалантиришга қарор қилди.

Султон рафиқасининг турли даврлардаги ролини тўрт нафар актриса ижро этади. Улар орасида голливудлик актриса Сара Хайланд ҳам бор. Асосий даврдаги Кёсемнинг ролини малласоч грек актрисаси Анастасия Тсилимпоу ижро этади. "Муҳташам юз йил" мухлислари Тсилимпоунинг Хуррам хонимнинг ролини ижро этган актриса Марьям Узерли каби машҳурликка эришишига унчалик ишонишмаяпти, бироқ актриса сериалда суратга тушиши эвазига Грецияда катта ҳақ олувчи 2-рақамли актрисага айланди.

Маълумотларга кўра, Кёсемнинг қизлик пайтидаги ролини Берен Саат ўйнаши ҳақидаги баҳслар ҳали ҳам тўхтамаган, чунки актриса ҳали ҳам сериалнинг бирорта афишасида пайдо бўлмади.

Янги сериалнинг биринчи сериясини Франциянинг Канн шаҳрида султон Сулаймон ролини ижро этган Холид Эргенчнинг ўзи тақдим қилади. Актёрнинг ўзи сериалда рол ижро этишини тасдиқламади. Сериал дунё телевидениеларида 2016 йилда пайдо бўлади.