2015 йил учун адабиёт йўналишида Нобел мукофоти таниқли беларусь ёзувчиси Светлана Алексиевичга тақдим этилди. Бу ҳақда 8 октябрь куни Стокгольмда Швед академиясининг доимий котиби Сара Даниус маълум қилди.

Алексиевич ҳужжатли-бадиий наср йўналишида ижод қилиб, ҳозирга қадар чечен уруши, Чернобил, Иккинчи жаҳон урушига бағишланган (“Урушда аёл тасвири йўқ” (1985), “Сўнгги гувоҳлар” (1985), “Сеҳрланган ўлим” (1993), “Чернобил жанозаси” (1997), “Сэконд хэнд вақти” (2013) номли бадиий-ҳужжатли асарларни яратган.

Уларнинг аксарияти 20дан ортиқ тилларга таржима қилинган.

Алексиевич, ўнлаб мукофотлар соҳиби ҳисобланади. Жумладан, Россиянинг “Триумф” (1997), Иоганн Готфрид Гердер (1999) мукофоти, Ремарка (2001), танқидчилар миллий мукофоти (АҚШ, 2006) ва бошқалар.

Адабиёт йўналиши XIX аср сўнгида швед саноатчиси ва ихтирочиси Альфред Нобель таъсис этган беш мукофотнинг бири ҳисобланади.

Тақдирлаш маросими анъанага мувофиқ, Нобел мукофоти асосчиси вафот этган сана – 10 декабрь куни Стокгольмда бўлиб ўтади. Мукофот пули қиймати эса 2015 йилда 8 миллион швед кронаси (953 минг доллар)ни ташкил этади.

Ўтган йилда бу мукофот франциялик Партик Модианога топширилганди.

9 октябрь куни тинчлик йўналишида Нобель мукофоти ўз эгасини топади.