ФИФАнинг расмий сайтида ташкилотнинг ахлоқ қўмитаси томонидан амалдаги президент Йозеф Блаттер ўз лавозимидан 90 кунга четлатилганидан кейин унинг вазифасини ким бажариши маълум қилинди.

Хабарда тасдиқланишича, шу вақтгача CАF раҳбари сифатида ишлаб келган Исса Ҳаёт яқин вақт ичида ФИФАнинг вақтинчалик президенти вазифасини бажаришга киришади.

Шунингдек, Блаттер каби 90 кунга футбол фаолиятидан четлатилган ФИФА бош котиби Жером Вальке ўрнини Маркус Каттнер эгаллайди.

Маълумот учун, камерунлик 69 ёшли амалдор 1988 йилдан буён Африка футол федерациясига раҳбарлик қилиб келмоқда. У ўз лавозимини сақлаб қолади. 2002 йилда у ФИФА президентлиги учун курашган, аммо Блаттерга имкониятни бой берган эди.