Германия экспорти августда июлга нисбатан 5,2 фоизга тушиб кетган ва бу 2009 йилдан бери энг ёмон кўрсаткич ҳисобланади. Бу ҳақда Bloomberg ахборот агентлиги маълум қилди. Мамлакат импорти ҳажми 3,1 фоизга қисқарган. Ташқи савдо профицити 15,3 млрд еврогача тушиб кетган (июлда бу кўрсаткич 25 млрд еврони ташкил қилган).

Мамлакат статистик хизмати кескин пасайишнинг сабабларини келтирмаяпти. Шу билан бир вақтда бу маълумотлар Евроҳудуддаги иқтисодий вазият ёмонлашаётганининг аломатларидан бири ҳисобланади.

Аввалроқ етакчи немис тадқиқот институтлари 2015 йилда иқтисодий ўсиш прогнозини 2,1 дан 1,8 фоизга туширган эдилар. Францияда тадбиркорлар кайфияти индекси 98 дан 97 гача тушиб кетган. Шу билан бирга Франция ялпи ички маҳсулоти ўсиши 2-чоракда нолга тенг бўлди.

Бироқ Евроҳудудда инвестицияларнинг секин-аста ўсиши ижобий белги бўлиб қолмоқда. Унинг эвазига 4-чоракда ЯИМнинг ўсиши умумий кўрсаткичи 0,5 фоизга эришади (3-чоракда 0,4 фоиз).

Агентликнинг таъкидлашича, Европа марказий банкининг иқтисодиётни рағбатлантиришга қаратилган қўшимча қадамлари, айниқса еврони кучсизлантиришга эришилса, ўсишнинг тезлашишига олиб келиши мумкин. Бу немис иқтисодиётини кўпроқ рақобатбардош қилади.