Олма-Ота шаҳри аэропортида озиқ-овқат маҳсулотлари жуда қиммат нархларда сотилиши Қозоғистон жамоатчилиги орасида жиддий муҳокамаларга сабаб бўлмоқда. Аэропорт раҳбарияти тадбиркорлар қўяётган нархларга таъсир ўтказа олмаслигини тан олди.

Аэропорт раҳбари Айбол Бекмуҳанбетовнинг сўзларига қараганда, бу ерда раҳбариятга бўйсунмайдиган, ижара асосида ишлайдиган тадбиркорлар истаган нархларида савдо қилишмоқда. Аэропорт маъмурияти уларга таъсир ўтказишга ҳақли эмас.

Nur.kz сайти у ердаги нархлар қайд қилинган бир қанча стенд ва жавдалларни суратга олиб, интернетда жойлаштирди. Расмларда кўринишича, қурт нархи 1 200 танга, 0.3 л сув 700 танга, круассан 900 танга, чупа-чупс 600 танга, “Дирол” сақичи 500 тангани ташкил қилмоқда.

Таъкидланишича, бу шунчаки расмий маълумотлар, халқаро терминаллар барларида нархлар янада юқорироқ.

Илк бора шу йилнинг апрелида йўловчилардан бири мана шундай суратни интернетга жойлаштирган эди. Унда битта сомсанинг нархи 1000 танга деб кўрсатилган эди. Бу ҳолат қизғин баҳсларга сабаб бўлди, фуқаролар аэропорт маъмуриятига ва бошқа масъул шахсларга мурожаатлар ёғилди.

Туман бошқармаси 2 ой текширув ўтказди, лекин ҳолатни яхшилай олмади. Фақатгина харидларга чек расмийлаштирмаётган сотувчиларга нисбатан чора кўрилди.
Шу билан бирга, расмийлар янги текширувнинг ўтказилмаслигини баён қилдилар.