Аввалроқ хабар қилинганидек, москвалик автомобиль эгаларида шов-шувга сабаб бўлган "В***ОР" сериясидаги автомобиль рақамлари Зеленограддан (Москвадаги маъмурий округ) чақиртириб олинди. Бу ҳақда ТАСС ахборот агентлигига Москва бўйича ИИВ бош бошқармаси матбуот хизмати бошлиғи Андрей Галиакберов маълум қилди.

"Зеленоградда жойлашган транспорт воситаларини давлат рўйхатидан ўтказиш бўлимларига ташриф буюрувчилар оқимининг сезиларли ошганини таҳлил қилиб, Москва Давлат йўл ҳаракати хавфсизлиги инспекцияси раҳбарияти "В***ОР 777" сериясидаги автомобиль рақамларини қайта тақсимлаш ҳақида қарор қабул қилди", деб айтди Галиакберов.

Галиакберовнинг айтишича, бу сериядаги рақамлар Москванинг турли округларида жойлашган рўйхатдан ўтказиш бўлимларига юборилган ва автомобиль эгаларига бошқа сериядаги рақамлар каби электрон навбат тартибида берилади.

"Москва Давлат йўл ҳаракати хавфсизлиги инспекциясининг бўлимларида махсус компьютер дастури ўрнатилган бўлиб, дастур тасодифий рақамлар принципи бўйича ишлайди. Бу рақамларнинг тақсимланиши жараёнига четдан аралашиш имкониятини истисно қилади", деб тушунтирмоқда Галиакберов.