Саудия Арабистонида ўз турмуш ўртоғини уй хизматчиси билан хиёнат қилганини видеога олган аёлга қамоқ жазоси билан таҳдид қилинмоқда. Бу ҳақда The Independent нашри маълум қилди. Нашрнинг маълумотларига кўра, аёл ҳурматсизлик ва обрўсизлантиришда айбланмоқда.  

Аёл мобиль телефонга ўз эрининг уй хизматчиси билан гаплашиб, кейин у билан ишқий муносабатларга кирганини видеога олган. У ўзининг хиёнаткор эридан ўч олиш мақсадида ижтимоий тармоқда ушбу видеони чоп этди ва "Бундай эр учун энг кичик жазо – уни изза қилишдир", деб ёзиб қўйди. 

Ушбу ролик интернетда тез тарқалиб кетди. Ижтимоий тармоқларнинг кўпчилик фойдаланувчилари алданган аёлни қўллаб-қувватладилар: "Сен бунга қандай жасорат билан ёндашганингни ижобий қаршилайман. Сен тўғри йўл тутдинг", деб ёзди блогер Ал Ямама.

Адвокатларнинг айтишича, аёл бир йилгача қамоқ жазосига ёки 500 минг риаллик (87,6 минг доллар) жаримага тортилиши мумкин.

Саудия Арабистони қонунларига кўра, обрўсизлантирувчи сурат ёки видеони олиш учун мобиль телефон ёки камерадан фойдаланган исталган одам жазога тортилади.