Бевосита Тожикистон чегараси яқинида турли террорчилик гуруҳлари, шу жумладан "Толибон" ҳаракати отрядларининг мавжудлиги Тожикистон ҳукуматида жиддий хавотир уйғотмоқда.

Бу ҳақда ТАСС ахборот агентлиги мухбирига Тожикистон Миллий хавфсизлик қўмитаси вакили маълум қилди.

"Охирги вақтларда Тожикистон-Афғонистон чегарасининг Бадахшон (Помир) қисмида асосан "Толибон" ҳаракатига мансуб бўлган қуролланган гуруҳлар ҳамда турли халқаро террорчилик гуруҳларининг ҳаракатларини кузатмоқдамиз. Жангариларнинг сони мингдан кўпроқни ташкил қилмоқда", деб айтди манба.

Манбанинг айтишича, "Афғонистон махсус хизматларининг тезкор маълумотларига кўра, толиблар Тожикистон билан чегарадош бўлган афғон қишлоқларининг катта қисмини назорат қилмоқда ва чегарага яқинлашишда давом этмоқда. Бу ҳолат Душанбени хавотирга солмоқда".

Маълумот учун, Тожикистон-Афғонистон чегарасининг умумий узунлиги 1400 км ни ташкил қилади.