УЕФАнинг алоқалар бўйича департаменти бошлиғи Педро Пинто ташкилот президенти Мишель Платини, ФИФА президенти Йозеф Блаттердан олинган деб гумон қилинаётган 2 миллион швейцария франки миқдордаги тўлов борасида ҳеч қандай тушунтириш бермаслигини айтди.

«Платини ҳеч қандай ёмон иш қилмаганини ва у ўзини оқлашга мажбур эмаслигини маълум қилади.

У бу борада айтилган фикрларга қўшимча қилмоқчи эмас», – деди Пинто.

Қайд этиш керакки, Платини ФИФА президентлиги учун 2016 йилнинг 26 февралида ўтказиладиган сайловда асосий номзод ҳисобланади.

Аввалроқ, ФИФАнинг ахлоқ бўйича Қўмитаси ташкилот раиси Йозеф Блаттерни 90 кунга ишдан четлатган, шунингдек Платинини ҳам четлатишни тавсия қилганди.