АҚШнинг НАТОдаги доимий вакили Дуглас Льют Сурияда бир батальон миқдорида россиялик ҳарбийлар борлигини маълум қилди, деб ёзмоқда The Wall Street Journal нашри.

Шу билан бирга, Льют Сурияда Россия ҳарбийлар гуруҳини тузишдан мақсад ҳали аниқ эмаслигини таъкидлаб ўтди. Унинг айтишича, ҳарбийлар ракета артиллерияси ва замонавий танклар билан қуролланган.

"Биз улар нима қилмоқчи бўлаётганликларини кузатиб борамиз. Латақиядаги Россия гуруҳи фақатгина ҳарбий базани ҳимоя қилиш учун яратилмаган, деган тахминлар бор", деб қўшимча қилиб ўтди Льют.

Аввалроқ Россия Мудофаа вазирлиги расмий вакили Игорь Конашенков Сурияда 50 дан кўпроқ самолёт ва вертолёт борлигини айтган эди. Унинг айтишича, Латақиядаги ҳарбий базани қўриқлаш учун алоқа воситаларига эга денгиз пиёда аскарлари батальон гуруҳи жалб қилинган.

Маълумот учун, бир батальонда 800 гача ҳарбий бўлиши мумкин.