Испаниялик машҳур қўшиқчи Хулио Иглесиас АҚШда миллиардер ҳамда АҚШ президентлиги учун номзодлардан бири бўлмиш Дональд Трампга тегишли казинолардан бирига киришдан бош тортди.

У "Вангуардиа" газетасига берган интервьюсида айтишича, у бундан олдин Трампнинг казиноларига бориб турган, лекин энди бу ишни бошқа қилмайди.

"У дунёни ўзгартираман деб ўйлайди. У муҳожирлар АҚШ учун нималар қилиб берганини унутиб юборди. У ҳақиқий масхарабоз", дея Трампнинг муҳожирларга нисбатан салбий муносабатлари ва чиқишларига жавоб қайтаради испаниялик хонанда.

Эслатиб ўтамиз, 30 сентябрь куни Нью-Гэмпшир штатидаги чиқишида Трамп сайловларда ғалаба қозонса, барча муҳожирларни Сурияга ҳайдаб солиши ҳақида айтганди.

Трамп бунгача ҳам Мексика ва Лотин Америкасининг бошқа мамлакатларидан келган меҳнат муҳожирларига нисбатан кескин қарашларини ифода қилиб келарди.