Бразилияда серияли қотилликда гумон қилинаётган 9 нафар полициячи қамоққа олинди. Ушбу полициячилар Сан-Паулу шаҳрида ўтказилган кенг кўламли амалиёт чоғида қўлга олинган.

Улар 13 август куни шаҳарда амалга оширилган серияли қотилликларда (бу қотилликлар давомида 19 киши қурбон бўлган) айбланади.

Маълум қилинишича, ўша куни шаҳардаги барлардан бири олдига машина келиб тўхтаган ва ундан капюшонли кийимдаги кишилар тушиб, одамларга қарата ўт очган. Худди шу ҳолат шаҳарнинг бошқа чеккаларида ҳам такрорланган.

Гувоҳларнинг айтишича, капюшонли кийимдаги бу қуролли кишилар ўз қурбонларини отишдан олдин уларни сўроққа тутиб, кимлиги ва ўтмишдаги жиноятлари ҳақида суриштиришган.

Бу воқеалардан сўнг, Сан-Паулу губернатори тезкор текширувлар ўтказиш ва айбдорларни топишга ваъда берганди. Шу кунгача бу жиноятларга алоқадор сифатида фақат бир киши ҳибс қилинганди.

Инсон ҳуқуқлари ҳимоячиларининг айишларича, Бразилияда полициячилар қўлидан ҳалок бўлувчилар нисбатан кўпчиликни ташкил қилади.

Amnesty International ташкилоти маълумотига кўра, фақатгина Рио-де-Жанейро шаҳрининг ўзида кейинги 5 йил ичида полициячилар 1,5 мингдан ортиқ кишини отиб ташлашган. Маълумотларда айтилишича, бразилиялик полициячилар таъқиб қилинаётган жиноятчиларни таслим бўлишига қарамасдан ёки жароҳат олганидан кейин ҳам отиб ташлайверишади.