24 сентябрь куни Макка яқинидаги Мино водийсида юз берган тиқилинчда ҳалок бўлганлар сони 1400 нафарга етди, деб хабар бермоқда Ассошиэйтед Пресс агентлиги.

Саудия Арабистони ҳукумати 26 сентябрдаги қурбонлар сони ҳақида расмий ахборот бермади. Мамлакат соғлиқни сақлаш вазирлигининг маълум қилишича, тиқилинчда 769 нафар киши ҳалок бўлган, 863 киши жароҳатланган.

Расмий маълумотларга таянган агентликнинг хабар беришича, 100 дан зиёд мамлакатдан келган зиёратчилар орасидан, 18 мамлакат фуқароси ҳалок бўлган. Шулар орасидан, 465 нафар эронлик, 148 нафар мисрлик, 120 нафар индонезиялик, 99 нафар нигериялик ҳалок бўлган, деб хабар бермоқда агентлик.

Шунингдек, улар орасида Покистон, Ҳиндистон, Мали, Бангладеш, Сенегал, Бенин, Камерун, Эфиопия, Марокаш, Жазоир, Гана, Чад, Кения ва Туркия фуқаролари бор.