АҚШ президенти Барак Обаманинг маъмурияти Сурия ҳудудидаги мухолифатчиларга ҳарбий сабоқ бериш бўйича ишлаб чиқилган дастур фаолиятини тўхтатиш бўйича қарор қабул қилган. Бу ҳақда The New York Times хабар берди.

Нашрда ёзилишича, президент маъмурияти Сурияда Пентагон томонидан 500 млн доллар сарфлаб тузилган ва ИШИД жангариларига қарши курашишда қўлланиши назарда тутилган бу дастур амалда ўз вазифасини бажармаганини тан олган.

Пентагон бу дастурни бугун, 9 октябрь кунида, АҚШ Мудофаа вазири Эштон Картер Лондондан қайтганидан кейин расман бекор қилмоқчи. Картер Англияга қироллик мудофаа вазири Майкл Фэллон билан Сурия ва Ироқдаги вазиятни муҳокама қилиш учун келган.

Маълумот берган манбанинг хабарига кўра, шунга ўхшаш тайёрлов маркази Туркияда пайдо бўлиши мумкин.

Эслатиб ўтамиз, 30 сентябрь куни Россия Сурия ҳудудида ИШИД жангариларига қарши ҳаводан зарба бериш амалиётларига киришди. АҚШ томони рус самолётлари ИШИД базаларини эмас, АҚШ томонидан қўллаб-қувватланувчи Сурия мухолифати базаларига бомба ёдираётганини иддао қилган.