Ўзбекистон автомобилсозлари Москвада Uz-Daewoo маркасининг давомчиси бўладиган янги Ravon бренди тақдимотини ўтказдилар. Ravon брендининг шиори қуйидагича: "Вақт билан синалган, янгидан яратилган".          

"Ravon сўзи ўзбекчадан "енгил, тоза йўл" маъносини билдиради. Охирги икки йил ичида бизнинг компания Daewoo маркаси харидорларининг дидлари ва эҳтиёжларини ўрганиб чиқди ва улар хатарли тажрибалардан кўра автомобилларда ҳамёнбоп нархларга вақт билан синалган сифатларни кўришни исташларини аниқлади", деб айтди "Ўзавтосаноат" АЖ бошқаруви раиси Тохиржон Жалилов.

Жорий йилда янги бренд фақатгина янги белгиларга эга Matiz ва Gentra автомобилларини сотади. Хусусан, Ravon Matiz ABS, хавфсизлик ёстиқлари, иммобилайзер, янги бамперлар, оптика ва радиатор панжараси билан таъминланади. Ravon Gentra эса рестайлинг қилинди. Автомобилларнинг нархлари янги бренднинг сайтида кўрсатилган.

2016 йилда ўзбек автомобилсозлари ўз моделлар қаторини Ravon R2 (Chevrolet Spark 2010 муқобили),  Ravon Nexia R3 кейинги авлод седани (Chevrolet Aveo 2008 муқобили) ҳамда батамом янги Ravon R4  (Chevrolet Cobalt) ҳисобига кенгайтиришни режалаштирмоқда. Кейинроқ моделлар қатори бир нечта С-синфидаги машиналар ва ихчам кроссовер ҳисобига тўлдирилади.