АҚШ мудофаа вазири Эштон Картер аввалроқ ОАВларда пайдо бўлган, АҚШ маълумотларига кўра, “Россиянинг Сурияга отган камида 4 та ракетаси Эронга тушгани” ҳақидаги хабарни тасдиқлади. Бу ҳақда Associated Press ахборот агентлиги маълум қилди.

Картер Лондонда Буюк Британия мудофаа вазири Майкл Фэллон билан биргаликдаги матбуот-анжуманида Пентагон ракеталарнинг тушишига уларнинг носозлиги сабаб бўлган бўлиши мумкинлиги ҳақидаги тахминни билдирди.

Бундан бир кун аввал CNN телекомпанияси АҚШдаги иккита юқори лавозимдаги шахсга иқтибос келтирган ҳолда Каспий денгизидан Сурияга отилган Россия ракеталари манзилга етиб бормай, Эронга тушганини маълум қилганди. Манбалардан бири бунинг оқибатида қурбонлар бўлиши мумкинлигини тахмин қилган, бироқ иккинчи манба бу ахборотни тасдиқламаган.

Россия Мудофаа вазирлигида CNN берган ахборот рад этилди ва отилган ракеталар ўз нишонига теккани айтилди.

РИА “Новости” ахборот агентлигининг Эрон Мудофаа вазирлигидаги манбаси ҳам Россия ракеталарининг Эрон ҳудудига тушгани ҳақидаги ахборотга эга эмаслигини маълум қилди. Бу ҳолатга Россия президенти Владимир Путин матбуот котиби Дмитрий Песков ўз муносабатини билдирди.

“Кремлда бунга қандай муносабатда бўлиш эмас, балки Эронда қандай муносабатда бўлиш муҳим, Эронда эса бу хабарлар инкор этилди”, деб айтди Песков.