Рим шаҳри мэри Иньяцио Марино бюджетдаги камомадда айбланиб, истеъфо беришга мажбур бўлди.

"Мен ишдан бўшатилдим", дея маълум қилган сиёсатчи. Унинг қўшимча қилишича, бу қарор Рим шаҳри манфаатлари учун қабул қилинган.

Маринонинг айтишича, унинг ўзи фақат Римни янада гўзал ва фаровон шаҳарга айлантиришни истаганди, лекин унинг бу ҳаракатида бир қатор тўсиқлар бўлган.

Иньяцио Марино муниципалитетга тегишли кредит карталаридан ўз мақсадлари йўлида фойдаланганликда айбланмоқда. Хусусан, у ўз оиласи билан ресторанларда овқатланиш учун давлатнинг 20 минг евро маблағини ишлатиб юборгани аниқланган. Мэр бу маблағни жойига қайтаришни ваъда қилган.

6 октябрь куни прокуратура мухолифатдаги 2 партия ("Ҳаракатдаги 5 юлдуз" ва "Италия биродарлари") мурожаати асосида текширув бошлаганди.

Мэр билан боғлиқ можаролар шу йилнинг августида ҳам содир бўлганди. Ўшанда мухолифатдагилар уни марҳум мафия бошлиғини тантанали равишда дафн қилиш маросимини уюштиргани учун айблашганди.

Июль ойида эса Римда мухолифатдагилар намойиш ўтказишган, улар мэрдан порахўрликка қарши кураша олмаётгани учун истеъфога чиқишини талаб қилишганди.

Маълумот учун, Иньяцио Марино 2013 йилнинг июнидан бери Рим мэри ҳисобланарди. У бу лавозимидан олдин сенатор эди.