Тошкентда бозорларни қишлоқ хўжалиги маҳсулотлари билан таъминлаш хизмати ходимлари судланди. “Огоҳ” нашрининг ёзишича, бунга уларнинг чет элдан арзон-гаровга ноқонуний сабзавот ва полиз экинлари олиб киргани сабаб бўлган.
Хизмат бошлиғи, 1963 йилда туғилган Фахриддин Восиқов ёрдамчиси, 1960 йилда туғилган Абдурасул Маҳмудов билан тил бириктириб, чет эл фуқароси Маъруф бин Фозил билан яширинча келишувга эришган. Бу шахс уларга ҳужжатлаштирилмаган, 1 кг га минг сўм нархда 5 минг тонна пиёз етказиб берган. Улар бу маҳсулотни бозорларда сота бошлашди. Бунинг натижасида маҳсулотлари қолиб кетган “Элга хизмат” жамиятлари 95 млн сўмдан ортиқ зарар кўрган.
Суд икки амалдорни жаримага тортиб, раҳбар лавозимларни эгаллаш ҳуқуқидан маҳрум қилди.