2015 йилнинг январидан ишлаб чиқарила бошлаган консерваланган Тошкент палови тез орада Россия савдо расталаридан пайдо бўлади, дея хабар бермоқда Sputnik.
Тошкент тўй ошини консервалаш илк марта Сергели туманида йўлга қўйилган бўлиб, айни пайтда ҳар ойда бир миллионга яқин консерва банкаси қадоқланмоқда.

“Ошпазлар гуруҳи ўз рецептлари бўйича 120 килограммлик қозонларда эрта тонгдан энг сара маҳсулотлардан фойдаланган ҳолда ош тайёрлашади”, - деди корхона вакили.
Шундан сўнг палов технологик тизим бўйлаб 335 ва 670 граммлик идишларга қадоқланади. Уларнинг истеъмол қилиш муддати 2 йилни ташкил этади. Мазкур маҳсулотларнинг асосий истеъмолчилари – хорижликлар, сайёҳлар ва чет эл бозорларидир.

“Биз Қозоғистонга умумий миқдори 60 минг банкани ташкил этувчи 2 синов партиясини етказдик. Айни пайтда Россия, Эрон ва Хитой билан музокаралар олиб борилмоқда”, - деди корхона вакили.
Компания ўз маҳсулотини яқинда Москвада бўлиб ўтган озиқ-овқат саноати кўргазмасида намойиш қилган. Ушбу маҳсулотга қизиқиш айниқса Узоқ Шарқ ва Сибир минтақалари вакиллари томонидан катта қизиқиш билдирилган.

Маълум қилинишича, компания режасида бошқа ўзбек миллий таомларини ҳам консервалаш кўзда тутилмоқда. Айни пайтда таркибий қисмларни тузиш ва зарур ҳужжатларни тайёрлаш ишлари олиб борилмоқда.