Қатар пойтахти Доҳа шаҳрида бокс бўйича ўтказилаётган жаҳон чемпионатида Ўзбекистон терма жамоаси аъзолари зафарли одимлашда давом этишмоқда.

Бугун бошланган чорак финал баҳсларида дастлаб рингга чиққан Муроджон Аҳмадалиев (56 кг вазн)Таиланд вакили Чатчай Бутдени мағлуб этди ва ярим финал йўлланмасига эга бўлди.

У ўзининг принципиал рақибини 3:0 (29:28, 30:27, 30:27) ҳисобида ғалаба қилган.

Қайд этиш керакки, бу орқали у таиландлик боксчидан реванш олди. Ушбу боксчилар 2015 йилги Осиё чемпионати финалида ҳам тўқнаш келишган ва унда Таиланд вакили ғалаба қилганди.

Маълумот учун, Муроджон Ахмадалиев нимчорак босқичида ўз вазн тоифасида биринчи рақам остида сараланган қозоғистонлик Кайрат Ералиевни 3:0 ҳисобида мағлуб этиб, чорак финалга чиққанди. Ундан олдинроқ эса Италия вакили Франческом Маеттони ишончли тарзда мағлубиятга учратганди.

Шу тариқа, Аҳмадалиев турнирда камида бронза медални кафолатлади. У ярим финалда ғалаба қилса, Бразилияда 2016 йили бўлиб ўтадиган Рио Олимпиадасига йўлланмани қўлга киритади.

Бугун ўзбекистонлик яна 6 нафар боксчи ўз жангларини ўтказиши кутилмоқда.

60 кг. Элнур Абдураимов (Ўзбекистон) – Отгондалай Доржнямбуу (Мўғулистон)

64 кг. Фазлиддин Ғоибназаров (Ўзбекистон) – Винченцо Мангиакапре (Италия)

75 кг. Бектемир Мелиқўзиев (Ўзбекистон) – Пётр Хамуков (Россия)

81 кг. Элшод Расулов (Ўзбекистон) – Адилбек Низимбетов (Қозоғистон)

91 кг. Рустам Тўлаганов (Ўзбекистон) – Эрисланди Савон (Куба)

+91 кг. Баҳодир Жалолов (Ўзбекистон) – Ҳуссайн Ишаиш (Иордания)