АҚШ томонидан ИШИД террорчилик ташкилотига қарши кураш ва Сурияда барқарорликни вужудга келтириш учун қўлланилаётган чоралар ҳозирча сезиларли натижа бераётгани йўқ. Мазкур баҳо 9 октябрь куни New York Times газетасининг электрон шаклида эълон қилинган мақолада келтириб ўтилади.

“Америка томонининг ҳаракатлари, танқидчилар қайд этганидек, баъзида қарама-қарши келиб қолиб, энг яхши ҳолатда маъносиз натижаларга эришишга хизмат қилмоқда”, - қайд этади нашр. Унинг нуқтаи назарига кўра, Вашингтоннинг ҳаракатлар тўртта асосий йўналишга бўлинади.

Улардан бири АҚШ фикрига кўра ИШИД жангариларига қарши курашадиган қуролли тузилмаларнинг ўзагини ташкил этувчи Сурия муҳолифати жангариларининг Пентагон томонидан ўқитилиши ва қуроллантирилиши эди. Нашрнинг қайд этишича, 500 млн долларлик мазкур дастурни амалга оширишда ҳарбий хизматдан қочиш, аскарликка чақирилган сонининг етишмаслиги каби кўплаб муаммолар вужудга келди ва натижада бир неча кишигина тайёрланди.

АҚШ Марказий разведка бошқармаси томонидан Сурия ҳукумати қўшинларига қарши курашаётган бир қатор гуруҳларга махфий ёрдам кўрсатишни ўз ичига олган иккинчи йўналишда ҳам унчалик омад кулиб боқмади. Нашрнинг қайд этишича, мазкур дастур бўйича ўқитилаётган бир қатор жангарилар “ал-Қоида”нинг Суриядаги бўлинмаси – “Дабҳат ан-Нусра” гуруҳи билан боғланишган. Оқибатда жангарилар дастурда қатнашаётган асосий тузилмаларга ҳужум қилиб, кўплаб Америка қурол-яроғлари, жумладан, замонавий танкка қарши ракеталарни қўлга киритишган.

АҚШ учинчи йўналиш - Ракка шаҳрини мудофаа қилиш, ИШИДга қарши ҳужум ташкил этиш кўзланган 3 мингдан 5 мингача араб жангариларини 20 минг курд аскарлари билан биргаликда қуроллантириш режасига кўпроқ эътибор қаратаётгани тўғрисида ҳам материалда тўхталиб ўтилди. Мазкур кучлардан Туркия ва Сурия чегараси ҳудудида “хавфсиз зона” ташкил этишда фойдаланиш режалаштирилмоқда.

АҚШнинг Суриядаги ҳаракатларида тўртинчи ва асосий йўналиш сифатида ИШИД позициялари бўйлаб авиазарбалар бериш айтилган. Мазкур ҳужумларга қарамасдан, жангарилар гуруҳи ҳали ҳам нафақат Ракка, балки Ироқнинг Мосул ва Рамади шаҳарларида ҳам яширинишмоқда.
New York Times, шунингдек, Россия Сурияда ҳарбий ҳаракатларни бошлаганидан сўнг АҚШ Россия ҳарбий самолётлари билан тўнашувлар эҳтимолини камайтириш учун Сурияда камроқ бомба ташлаб, кўпроқ Ироқ ҳудудига авиазарбалар беришни бошлаганига эътибор қаратиб ўтган.