2015 йил 4 октябрь куни 22:20да Сурхондарё вилояти Денов ИИБ ходимлари Денов шаҳри станцияси яқинидаги темир йўл кўтармаси олдида “Конибодом-Душанбе” йўналиши бўйлаб Ўзбекистон Республикаси ҳудудидан транзит қатновини амалга ошираётган поезддан тушиб кетиши оқибатида турли даражадаги тан жароҳатларини олган 1995 йилда туғилган Тожикистон Республикаси ҳарбий хизматчиси, муддатли хизмат аскари Ф.Раҳматзода ётганини аниқлашди.

Ўзбекистон Республикаси Миллий хавфсизлик хизматининг Давлат чегараларини ҳимоя қилувчи қўмитасининг матбуот хизмати хабарига кўра, ҳарбий хизматчи саломатлиги оғир ҳолатдалиги сабабли Денов шаҳар марказий шифохонасига ётқизилиб, тез тиббий ёрдам кўрсатилди.
“Икки кун давомида Ф.Раҳматзода жонлантириш бўлимида малакали мутахассислар назорати остида хушсиз ҳолатда ётиб, унга ҳар томонлама беминнат тиббий ёрдам кўрсатилди”, - дейилади матбуот хизмати хабарида.

Шунингдек, тожикистонлик ҳарбий хизматчи Ўзбекистон Республикаси ҳудудида бўлган тўлиқ муддат давомида Тожикистон Республикаси Мудофаа вазирлиги ҳарбий хизматчиси подполковник А.Исломов у билан бирга бўлди.
“2015 йил 7 октябрь куни Ф.Раҳматзоданинг саломатлиги ва транспортда олиб кетилиш ҳолати яхшиланганидан сўнг Тожикистон Республикаси ҳарбий хизматчиси тожик ҳамкасбларга топширилди”, - дея хабарга якун ясади ўзбек чегара хизмати матбуот хизмати.