Пентагон Intelsat компаниясининг иккита ускунасига хавфли даражада яқинлашган Россиянинг “Луч” (“Нур”) сунъий йўлдошининг хатти-ҳаракатлари сабабли экспертлар ва ҳарбийлар билан бир қатор йиғилишлар ўтказди. Бу ҳақда Space News нашри хабар қилди.

Нашр маълумотига кўра, Россия ускунаси беш ой давомида Intelsat 7 ва Intelsat 901 сунъий йўлдошлари ўртасидаги геостационар орбитада ҳаракат қилган. У 2014 йил сентябрь ойида учирилганидан етти ой ўтиб, бир нечта манёрвларни амалга оширгандан сўнг ушбу орбитани эгаллаган.

Сўнгги вақтларда “Нур” бир неча маротаба Intelsat сунъий йўлдошларига хавфли даража (10 километргача)да яқинлашган. Сунъий йўлдош мутахассислари шу муносабат билан хавотирга тушиб, Пентагондан ёрдам сўраган, шунингдек, Россия томонига мурожаат юборган.

Нашрнинг маълум қилишича, улар ҳали ҳам жавоб олмаган.
“Бу нормал ҳолат эмас ва биз хавотирдамиз”, - деди Intelsat президенти Кей Сирс Space News билан бўлиб ўтган интервьюда. Компания Россия ускунасининг Intelsat 7 ва Intelsat 901 сунъий йўлдошлари фаолиятига салбий таъсир кўрсатмаслигига чақирмоқда.