Қирғизистонда саккиз яшар бола ҳожатхона ўрасига тушиб кетган икки яшар синглисини қутқариб қолди

Жамият 10 Октябрь 2015 5076

Қирғизистоннинг Ўш шаҳрида иккинчи синф ўқувчиси ҳожатхона ўрасига тушиб кетган икки яшар синглисини ярим соат давомида ушлаб турди.

Ўш шаҳри таълим бўлимининг хабар беришича, 5 июль куни шаҳардан унча узоқ бўлмаган Жепалак қишлоғида икки яшар Солиҳа Эргешова 5 метр чуқурликдаги ҳожатхона ўрасига тушиб кетди.

Бу ҳақда кўрган ва эшитганлар унга ёрдамга ошиқишди. Аммо айрим тўсиқлар сабаб қизни у ердан олиб чиқа олишмайди. Ана шунда, унинг акаси Байзат Эргашев белига арқон боғлайди ва мустақил равишда у ерга тушиб, то қутқарувчилар келиб, уларни тортиб олмагунича, ўша ерда синглисини кўтариб тураверади.

Аввалроқ мамлакат ФВВ ходимлари Байзат Эргашевни мардлик ва қаҳрамонлик фахрий ёрлиғи билан мукофотлашган эди. У истеъдодли болалар ўқийдиган “Қирғиз-турк дўстлиги” 52-умумтаълим мактабида таҳсил олади.

Қизалоқни ҳожатхона ўрасидан олиб чиқишганида, у ҳушсиз эди. Биринчи тиббий ёрдамни унга қариндошлари кўрсатишди.

Қизча 10 кун давомида Ўш шаҳар шифохонасининг жонлантириш бўлимида ётди. Ҳозирда қизча саломат, унинг онаси Гулмира Бердиева ўғли Байзатдан жудаям рози.

Кўпроқ янгиликлар