Қозоғистоннинг Туркистон шаҳридаги болалар боғчасида 3 яшар бола идиш-товоқ ювишга мўлжалланган ишқорли эритмани ичиб юборди. Шундан сўнг тарбиячилар даволаш мақсадида болага марганцовкали эритмани ичиришган. Натижада унинг овқат ҳазм қилиш аъзолари кучли куйиш жароҳатини олган. Болага узоқ муддатли даволаш чоралари белгиланди, дея хабар қилмоқда КТК.

Туркистон шаҳридаги 16-мактаб қошида ташкил этилган болалар боғчаси тарбияланувчиси ҳисобланган Нурисломнинг жароҳат олиши ортидан тарбиячилар ишдан бўшатилиб, муассаса ҳамшираларига хайфсан эълон қилинган. Шунингдек, мазкур иш юзасидан жиноий иш қўзғатилган.
Муассаса раҳбари Бибигул Амирбекованинг таъкидлашича, боланинг даволаниши учун унинг ота-онасига шу вақтга қадар 300 минг тенге йиғиб берилган. Боланинг жароҳат олган аъзолари бир йил ичида соғайиши айтилмоқда.

Маълумотларга кўра, айни пайтда Туркистон вилоят шифохонасида хўжалик кимёвий моддаларидан жароҳат олган 20 нафар бола даволанмоқда. Уларнинг икки нафарига қизилўнгачни кўчириб ўтказиш лозим.