9 октябрь куни Тошкент Вестминстер университети битирувчилари шарафига битирув маросими бўлиб ўтди, деб маълум қилмоқда “Туркистон пресс” МАА. У инглиз олий ўқув юртининг анаъналарига мос равишда ўтди.

Ҳар йили университетда ташкил этиладиган битирув оқшомига олий ўқув юртининг Лондондаги раҳбарияти ташриф буюради. Бу сафар маросимга университетнинг глобал ривожланиш бўйича проректори профессор Александра Хьюс меҳмон бўлди.

Шунингдек, маросимда халқаро бизнес ва менежмент (MA in International Business and Management) ҳамда педагоглар учун махсус дастур (PG Cert of Special Study in Learning and Teaching) йўналишларида магистр таълим йўналиши битирувчилари ҳам қатнашишди.

“Университет 2002 йилда ташкил топган ва бугун 11-битирув маросимини ўтказяпти. Ўтган 13 йил давомида университетни 1300 нафар битирувчи тамомлади. Улар бугун республикамиз ва жаҳон мамлакатлари иқтисодий тараққиётига муносиб ҳиссаларини қўшиб келишмоқда”, - деди маросимда олий ўқув юрти ректори.