Қозоғистоннинг Туркистон шаҳри фуқароси травматик қурол билан ўз оила аъзоларини отиб ташлади. У ўз турмуш ўртоғи, беш ёшли қизи ва икки акасининг умрига зомин бўлди. Шунингдек, жиноятчи олти ёшли ўғли ва онасини жароҳатлаб, ўз жонига қасд қилишга ҳаракат қилди. Бу ҳақда “Интерфакс-Қозоғистон” полиция вакили хабарига асосланиб маълум қилди.
Ҳодиса 10 октябрь куни содир бўлди. 30 ёшли жиноятчи, унинг 52 ёшли онаси ва ўғли шифохонага ётқизилди. Улар жонлантириш бўлимида оғир аҳволда даволанмоқда.
Ҳодиса жойида 9 миллиметр калибрли Streamer травматик тўппончаси, уч гильза, икки патрон, спорт гантели ва электрошокер топилди.
Шу муносабат билан жиноий иш қўзғатилди. Тергов маълумотларига кўра, жиноят рашк туфайли содир этилган.