Россия ва Эроннинг Яқин Шарқдаги фаол ҳаракатлари туфайли АҚШнинг минтақада ҳукмронлигини йўқотгани яққол бўлиб қолди, деб ёзмоқда The Wall Street Journal нашри.

“АҚШнинг минтақадаги ишларга таъсири ва иштироки Иккинчи жаҳон уруши замонларидан бери энг кучли таназзулни бошидан кечирмоқда”, деб айтмоқда АҚШнинг Афғонистон, Ироқ, Сурия, Ливан ва Покистондаги собиқ элчиси Райан Крокер. Унинг айтишича, минтақада ҳосил бўлган сиёсий бўшлиқни Вашингтон тўхтатмоқчи бўлган кучлар тўлғазмоқда.

Вашингтоннинг Яқин Шарқда анчагина ҳарбий қудрати қолаётганига қарамасдан, унинг иттифоқчилари ва рақиблари АҚШнинг келгусида ҳам ўз дўстларини қўллаб-қувватлашига ишонмай қўйдилар, деб ҳисобламоқдалар таҳлилчилар. “Минтақада ҳозир АҚШни қўллаб-қувватловчи бирорта гуруҳ йўқ, бу ҳайратланарли”, деб таъкидламоқда Стратегик тадқиқотлар халқаро институти таҳлилчиси Эмиль Хокайем. Унинг айтишича, либерал доираларнинг фикрича, Барак Обама авторитар етакчиларга эрк бермоқда, улар эса АҚШ тимсолида ишончсиз иттифоқчини кўришмоқда.

Таҳлилчининг фикрича, АҚШ Яқин Шарқда ҳукмронлигини батамом йўқотган. “Обамадан кейин келадиган президентда унчалик ҳам кўп имконият қолмайди. Мен кейинги президент учун ҳам стратегияни кўрмаяпман. Биз жуда чуқурлашиб кетдик”, деб таъкидламоқда Хокайем.

АҚШнинг Яқин Шарқдаги иттифоқчилари хавотирга тушганлар ва Россия билан муросага боришга ҳаракат қилмоқдалар, деб таъкидламоқда WSJ нашри. Мисол учун, Исроил ўтган йили Қримга нисбатан АҚШ томонидан илгари сурилаётган БМТ Бош ассамблеяси резолюциясини қўллаб-қувватлашдан бош тортган, ҳозир эса Россиянинг Суриядаги авиазарбаларини танқид қилмаяпти.