Қозоғистоннинг Қизилўрда вилоятидан бўлган қизча Олма-Отадаги тиббиёт марказларидан бирида даволаниш учун квота олганидан сўнг бир кун ўтиб вафот этди. Маҳаллий мутахассислар унинг касаллигига ташҳис қўя олишмади. Унинг вазни мунтазам равишда камайиб, охир-оқибат ҳаётдан кўз юмди, дея ёзмоқда “Карвон”.

2015 йилнинг 25 сентябрь куни Арай онаси билан Олма-Отадаги Педиатрия ва болалар жарроҳлиги марказига келишди. Қизалоқ зудлик билан жонлантириш бўлимига ётқизилиб, сунъий нафас ускунаси уланди. Қизалоқда кислород, оқсил ва қувват етишмаслиги, озғинлик аломатлари қайд этилди.

Шифокорларнинг айтишича, Арай 2014 йил ноябридан буён мунтазам даволаниб келган. Унинг қонидаги гемоглабин миқдори мутазам равишда пасайиб келган. Таъкидланишича, барча ташҳислар тўлиқ бўлмаган, айрим талаб қилинган текширувлар мутлақо ўтказилмаган. Олма-оталик шифокорлар Арайда оғир пневмонияни ҳам қайд этишган, бироқ амбулатор картасида бу ҳақда қайдлар учрамаган.

Марказ директорининг айтишича, барча мураккаб текширувлар узоғи билан бир ой вақтни олса-да, 9 ой давомида болага ташҳис қўйилмаган.
Ўз вилоятидаги шифокорлар касалликка ташҳис қўя олмаганидан сўнг фарзандини Олма-Ота шаҳридаги тиббиёт марказида даволашга етарлича маблағ топа олмаган ота-она ОАВга мурожаат қилганидан сўнг квотани қўлга кирита олган. Бироқ қизчага ўз вақтида ёрдам кўрсата олишмаган.