Исроилнинг шимолий қисмида уч нафар исроиллик фуқароларга жароҳат етказган ёш араб миллатига мансуб жиноятчи қўлга олинган.

Исроил ҳуқуқ-тартибот идоралари томонидан берилган маълумотга кўра, жиноятчи томонидан қилинган ҳужум натижасида уч нафар оддий фуқаро ва бир нафар аёл полиция ходими жиддий шикастланган.

Фаластин тиббиёт ходимларининг берган маълумотига кўра, Ғарбий соҳил яқинида фаластинлик 13 ёшли бола исроиллик аскарлар томонидан отиб ўлдирилган. Воқеа яҳудий аҳоли яшаш пунктидаги тўқнашув вақтида вужудга келган.

Олдинроқ фаластинлик аёл Ғарбий соҳил бўйидаги назорат ҳудудида полиция томонидан тўхтатилганда ўзида ўрнатилган портловчи қурилмани ишга туширган, портлаш натижасида аёл ва полиция ходими зарар кўришганди.

Исроилликлар ва фаластинликлар ўртасидаги тўқнашувлар сўнгги кунларда тез-тез содир бўлмоқда. Ўтган ҳафтада Исроил полицияси фаластинликлар қадим шаҳар Қуддусдаги Ал-Ақса масжидига киришни чеклаб қўйганди.

Ўтган ҳафта охирида ўша ҳудудда юзага келган тўқнашувлар натижасида икки нафар исроиллик фуқаролар фаластинликлар томонидан пичоқлаб кетилганди. Айнан мана шу сабаб Эски шаҳар фаластинликлар учун ёпиб қўйилганди.