Россия Федерал хавфсизлик хизмати Москва жамоат транспортида теракт амалга оширишга тайёргарлик кўргани учун қўлга олинган шахслар Россия фуқаролари эканлигини маълум қилди, деб хабар бермоқда РИА “Новости” ахборот агентлиги.

“Россия Федерал хавфсизлик хизмати томонидан ўтказилган тезкор-қидирув тадбирлари давомида Москвада теракт уюштирмоқчи бўлган россиялик фуқаролар гуруҳи аниқланди”, дейилмоқда ФХХ берган хабарда.

Маълум қилинишича, ИШИД лагерларида тайёргарликдан ўтган ушбу террорчилар Россия ИШИД позицияларига авиазарбалар беришни бошлаганидан олдин Россияга келишган. Улар Москва марказидаги уйлардан бирида қўлга олинган.

ФХХнинг маълум қилишича, террорчилар Москва жамоат транспортида теракт амалга ошириш учун 5 кг портловчи моддадан бомба тайёрлашган.

Эслатиб ўтамиз, куннинг биринчи ярмида Москвада теракт содир этишда гумон қилиниб, қўлга олинганларнинг сурияликлар бўлиши мумкинлиги айтилганди.

Маълумот ўрнида таъкидлаб ўтиш жоиз, Москвада содир этилиши мумкин бўлган теракт ҳақида 11 октябрь куни кечқурун Миллий антитеррор қўмитаси огоҳлантирганди. Тезқор тадбирлар натижасида қўлбола портловчи моддалар топилгани хабар қилинган.