Интернетда Pepsi компаниясининг янги смартфони P1 ҳақида инсайдерлик маълумоти пайдо бўлди, деб ёзмоқда Gizchina нашри.

Маълумотларга кўра, смартфон 1920х1080 пикселли 5,5 дюймли экран билан таъминланади ва такт частотаси 1,7 ГГц ли 64 битли MediaTek MT6592 процессори негизида ишлайди.

Смартфоннинг тезкор хотираси 2 Гб, ички флеш-хотираси 16 Гб ни ташкил қилади. Смартфон мос равишда 13 ва 5 Мп ли асосий ва фронтал камералар билан жиҳозланади. Аккумулятор сиғими 3000 мА-соатни ва қурилманинг қалинлиги 7,7 мм ни ташкил қилади.

Бундан ташқари, смартфон металл корпус, деярли “рамкасиз” экран ва дактилоскопик сканер билан жиҳозланади. Pepsi P1 нинг орқа қопқоғидан компания логотипи жой олади. Смартфонда операцион тизим сифатида Android 5.1 олинади.

Маълумотларга кўра, янги смартфон 20 октябрда – HTC One A9 смартфони намойиши билан бир кунда намойиш қилинади. Pepsi P1 200 доллардан бошлаб сотилади.