12 октябрга ўтар кечаси Қирғизистоннинг Чуй вилоятида жойлашган 50- сонли тергов изоляторидан 9 нафар маҳбус уч соқчини ўлдириб, қочиб кетишди. Бу ҳақда мамлакат бош вазири Темир Сариев хавфсизлик расмийлари билан фавқулодда йиғилишда маълум қилди.

Шунингдек, Жазони ижро этиш давлат хизматининг бир ходими ва судланганлардан бирини ҳам жароҳатлашди, дея хабар бермоқда мамлакат ЖИЭДХ матбуот хизмати.

“Қочиш далили бўйича жиноий иш қўзғатилиб, махсус комиссия тузилди, расмий тергов олиб борилмоқда ва маҳбусларни қўлга олиш бўйича барча зарур чоралар қўлланилмоқда”, - дея хабар қилинди.

Полициячилар тезда ўғирланган автомобилни топиб, қочқиндаги жиноятчиларнинг беш нафарини қўлга олди, тўрт нафари эса озодликда. Ҳудудда “Қўлга олиш” режаси амалга оширилмоқда.

Қайд этилишича, озодликдаги жиноятчиларнинг икки нафари умрбод қамоқ жазосига ҳукм қилинган бўлса, қолган иккиси устидан суд жараёни бўлиб ўтаётган эди.

Уларнинг барчаси диний экстремизм ва терроризмда айбланиб, жазога тортилган. Шу билан бирга, озодликдаги маҳбусларнинг уч нафари 2011 йилда Бишкекда қўлга олинган бўлиб, улар “Жайшул-Маҳдий” радикал гуруҳи аъзолари ҳисобланишган.

Жанубий Норус қишлоғи пойтахт Бишкек шаҳридан бир неча километр масофада жойлашган. Ҳуқуқини муҳофаза қилиш органлари фуқаролардан огоҳ бўлишни ва қочқиндаги жиноятчилар тўғрисидаги ҳар қандай ахборотни тегишли муассасаларга етказишни сўрамоқда.