Россиянинг «Россия 1» федерал телеканали орқали тез орада Ўзбекистон ҳақида ҳикоя қилувчи 25 қисмдан иборат «Шарқ афсоналари» сериали эфирга узатилади. Бу ҳақда фильм режиссёрларидан бири Рустам Саъдуллаев Sputnik нашрига берган интервьюси чоғида маълум қилган.

Ўзбекистонлик актёр-режиссёр Саъдуллаевнинг таъкидлашича, ҳозирда мазкур фильм сценарийсини ёзиш ишлари тугатилмоқда.

«Бу сериал нима ҳақида деб сўрашингиз табиий, албатта. Биз шарқнинг ҳақиқий гавҳарларидан бири бўлган Буюк ипак йўли қоқ марказида жойлашган Ўзбекистон ва ундаги одамларнинг узоқ вақтлардан буёнги турмуш тарзини ёритиб беришни мақсад қилдик», — дейди Саъдуллаев Sputnik нашрига берган интервьюси чоғида.

Актёрнинг сўзларига кўра, ВГТРК қошидаги «Россия 1» телеканали ва Россия продюсерлик марказларидан бирининг ғояси асосида вужудга келмоқда.

Саъдуллаевнинг ўзи мазкур лойиҳада ҳампродюсер ва режиссёр сифатида ишлайди. Шунингдек актёр сериалдаги қаҳрамонлардан бирининг ролини ижро этиши мумкинлигини ҳам билдирган.

«Иккинчи Россия-Ўзбекистон қўшма лойиҳаси тўлиқ метражли шарқ шаҳзодаси ва камбағал қиз ҳақидаги бадиий фильм бўлади. Фильм шарқнинг гўзал муҳаббати ҳақида эртак кўринишида бўлади. Афсуски, эртак жанридаги бундай фильмлар камайиб кетган. Фильм Бухородаги қишлоқларда суратга олиниши режалаштирилган», дейди Саъдуллаев.