Россиялик журналист, режиссёр, аномал ҳолатларни тадқиқ этувчи лойиҳалари билан машҳур Николай Субботин жорий йилнинг октябрида Ўзбекистонга сафар уюштиради. Бу ҳақда у “Комсомольская правда” газетасига берган интервьюсида айтиб ўтди.

Субботиннинг таъкидлашича, у Ўзбекистон ҳудудида Россиянинг Челябинск вилоятида аниқланган Арқаим археологик манзилгоҳига ўхшаган объект борлигидан хабар топган ва у ерда тадқиқот ўтказмоқчи. Арқаим кўпчилик мистиклар томонидан кўплаб афсона ва ривоятлар билан боғланади. Илмий нуқтаи назардан эса шунчаки бронза асрига оид диққатга сазовор протошаҳарчилик ёдгорлигидир. Унинг спиралсимон қурилиши ўз вақтида кўплаб меъморий масалаларни олимлар кун тартибига қўйган.

Субботиннинг эътироф этишича, у Ўзбекистон ҳудудида мана шунга ўхшаш спиралсимон манзилгоҳ борлигини фазодан туширилган суратлар таҳлили асосида аниқлаган. Лекин реклама ролигидан маълум бўлишича, экскурсия Қадимги Хоразм ёдгорликлари, биринчи навбатда, спиралсимон қурилишга эга Қўйқирилганқалъа объектига уюштирилади.