Юнусобод туманида ишга туширилган янги марказда турли маданий-маърифий тадбирлар ўтказиш ҳамда ансамбль ва бадиий гуруҳларнинг фаолият кўрсатиши учун барча шароит яратилган. Бу ерда мумтоз қўшиқ ва мақом ижрочилиги, миллий чолғу ижрочилиги, рақс ва бадиий сўз санъати тўгараклари, фольклор-этнографик жамоалар фаолият олиб бориши режалаштирилган.

УзА хабарига кўра, йигирма мингдан зиёд аҳолига беминнат хизмат кўрсатувчи янги марказ спорт заллари, интернет клуб, 400 ўринли томоша залига эга.

Тошкент шаҳар маданият ва спорт ишлари бош бошқармаси берган маълумотларга кўра, пойтахтимизда 2013-2018 йилларда жами ўттиз тўртта маданият уйини реконструкция қилиш ва таъмирлаш, замонавий асбоб-ускуналар билан жиҳозлаб, маданият ва аҳоли дам олиш марказларига айлантириш белгиланган. Жорий йилда еттита маданият ва аҳоли дам олиш маркази фойдаланишга топширилади.