Жанубий Кореяда MERS коронавирусидан даволанган одам бу хасталик билан қайта касаллангани қайд этилди.

Ёнхап агентлиги хабарига кўра, беморнинг вирус билан қайта касаллангани тасдиқланган.

Шунга қарамасдан, у бошқалардан ажратиб қўйилмагунга қадар шифохона умумий бўлимидаги беморлар билан алоқада бўлган.

Ҳозирги вақтда вирус аниқланган бемор Сеулдаги "Самсон" шифохонасида бўлиб турибди.

Эслатиб ўтамиз, Корея Республикасида шу йилнинг май ва июнь ойларида MERS короновируси кенг тарқалди. Натижада бу касаллик туфайли жами 186 киши зарарланиб, улардан 36 нафари ҳаётдан кўз юмган эди. Шундан буён ҳозирга қадар мазкур касаллик қайталамаганди.

Яқин Шарқ респиратор синдроми коронавируси — MERS касаллигига илк чалиниш ҳолати Саудия Арабистонида 2012 йилда рўй берган бўлиб, хасталик Яқин Шарқ, Жанубий Корея, Таиланд ва бошқа бир қатор мамлакатларга тарқалди. У эрта босқичларда ҳеч қандай алоҳида аломатларни юзага чиқармайди. Одатда иммунитети суст, сурункали ўпка касалликлари ва буйрак етишмовчилиги мавжуд инсонлар ушбу касалликни осон юқтириб олади. Ҳозирча хасталикка қарши вакцина ишлаб чиқилмаган.