Голландия ҳарбий ҳаво кучларининг Гилзе-Рейн базасида Нидерландлар хавфсизлиги бўйича кенгаш раиси Тьиббе Йустра қарийб 15 ой давом этган тергов ишлари якунларига бағишланган ҳисоботни эълон қилади.

Ҳужжатда тўртта асосий саволга жавоб берилган бўлиши керак. Малайзиядан Нидерландияга парвозни амалга ошираётган самолётнинг ҳалокатга учрашига нима сабаб бўлгани уларнинг энг асосийси ҳисобланади. Ҳисоботда, шунингдек, можаролар ҳудуди устидан парвознинг амалга оширилгани сабаби тўғрисида ҳам хулосалар ўрин олган. Шу билан бирга, у нима учун авиафалокат қурбонларининг яқинлари икки кундан тўрт кунгача Boeing бортидаги яқинларининг жойлашган ўрни тўғрисида голланд ҳукумати тасдиғини кутгани масаласига жавоб талаб қилади. Ниҳоят, ҳисоботда лайнер қулашни бошлаган вақтда одамларнинг нималарни ҳис этгани даражаси тўғрисидаги саволга жавоб берилади.

Хабарда қайд этилишича, мазкур тергов айбдорлик ёки жавобгарлик масаласи билан шуғулланмади. Ушбу мақсадлар голланд прокуратураси олиб бораётган жиноят ишида кўриб чиқилади.

Бу борадаги дастлабки тахминий ҳисобот 2014 йил 9 сентябрда эълон қилинган эди. Унда мутахассислар самолёт ҳалокатига “кўп миқдордаги юқори даражада қувватлантирилган зарраларнинг тушиши, натижада самолёт ҳаводаёқ парчаларга бўлиниб кетгани” айтилганди.

“Malaysia Airlines” авиакомпаниясига тегишли Boeing-777 йўловчи самолёти 2014 йилнинг 17 июль куни MH17 рейси бўйича Амстердамдан Куала-Лумпурга парвозни амалга ошираётган вақтда Украинанинг Донецк вилояти устида ҳалокатга учраган эди. Натижада самолёт бортидаги 298 киши ҳаётдан кўз юмди.