Италиялик мураббий Карло Анчелотти 2016 йилнинг ёзидан "Бавария" жамоасини бошқариши мумкин.

Sport Mediaset нашри маълумотларига кўра, 56 ёшли мутахассис мюнхенликлар жамоаси раҳбарияти билан учрашган ва 2 йиллик шартнома тузиш борасида келишувга эришган.

Ушбу келишув, кейинги йилнинг ёзида жамоанинг айни пайтдаги мураббийи Хосеп Гвардиола бошқа жамоага ўтса, кучга кириши айтилган.

Эслатиб ўтамиз, бундан олдинроқ, Гвардиола 2016 йилнинг ёзида "Манчестер Сити"да иш бошлаши ҳақида хабарлар тарқалганди.

Карло Анчелотти эса "Реал" бошқарувидан кетгач, таътилга чиққан, бу вақт ичида у "Ливерпуль" жамоаси таклифини рад этганди.

Бироз олдинроқ, ушбу мутахассис "ПСЖ" жамоасига қайтиши мумкинлиги ҳақида хабар қилинганди.

Унинг ўзи эса, таътили тугагач, 2016 йилнинг январида АПЛ клубларидан бирида ишлашни исташи ҳақида айтганди.