Ҳиндистоннинг Мумбай шаҳрида яшовчи 45 ёшли эркак шифокор хато тарзда уни ўлик деб топгандан кейин танасини текшириш учун ёрилишига бир дақиқа қолганда ҳушига келди, деб ёзмоқда The Daily Mail нашри.

Нашр исмини келтирмаётган эркак автобусда ҳушидан кетиб қолган. Полиция уни шифохонага олиб борган, бу ерда шифокорлар унинг пульси урмаётганини қайд қилиб, уни ўлган деб хулоса чиқаришган. Бош шифокор Рўхан Рўхекар шифокорлик хатосининг олдини олиш учун беморни хона ҳароратида 2 соатга қолдиришни талаб қиладиган шифохона қоидасига зид равишда, “жасад”ни ўликхонага жўнатган.

Ўликхона ходимларининг айтишича, улар эркак танасини эндигина ёрмоқчи бўлганларида “жасад”нинг қорни чиқиб-тушаётганини пайқаб қолишган. Нашр ҳинднинг тўсатдан ўзига келиши сабабларини келтириб ўтмаган.

Бош шифокор эркакнинг ўзига келганидан хабар топгач, унинг ўлими ҳақидаги хулосани йўқ қилиб юборган, бироқ кейинроқ унинг бу қилмиши ошкор бўлган.

Шифохона ходимлари воқеа жойига етиб келган полициячиларни дарров ичкарига қўйишмаган. Кейинроқ полиция инспектори бу ҳолат шифокорлик масъулиятсизлигининг жиддий ҳолати эканлигини ҳамда бош шифокордан тергов натижалари ҳақида ҳисоботни кутиб қолишини айтган.

Шифохона раҳбари шифокор Сулаймон Мерчант инсон жароҳат олганда ёки карахт ҳолга тушганда пульс сезилмаслиги оддий ҳол эканлигини айтган. Унинг айтишича, Рўхекар яқиндагина ўз лавозимида ишлай бошлаган ва барча жараёнлардан яхши хабардор бўлмаган. Мерчантнинг айтишича, айбдор ҳайфсан олган.

"Ҳаётга қайтиб келган" эркак ҳозирда қулоқ инфекцияси ва тўйиб овқат емасликдан даволанмоқда.