Ўзбекистон ва Афғонистон ўртасида 2016 йилда электр энергия етказиб бериш бўйича музокаралар давом этмоқда, деб хабар берди “Ўзбекэнерго” компанияси вакили Uzbekistan Today нашрига.

Вакилнинг айтишича, яқинда Тошкентга Афғонистон делегацияси ташриф буюрди ва ўзбекистонлик ҳамкасблари билан кейинги йил учун электр энергия етказиб беришнинг янги шартларини муҳокама қилди.

Томонлар янги келишувнинг бир қатор бандлари бўйича дастлабки келишувларга эришдилар. Тошкентдаги учрашув яқин орада янги шартнома имзолаш учун деталларни аниқлаштириб олишга имкон берди.

Расмий маълумотларга кўра, Афғонистонда ҳар йили электр энергияга эҳтиёж 10 фоизга ошиши қайд қилинади.

2007 йилнинг июнида Тошкентда “Ўзбекэнерго” ДАК ва Афғонистон энергетика ва сув захиралари вазирлиги билан музокаралар баённомаси имзоланган бўлиб, унда Афғонистонга электр энергия етказилиши ҳажми 300 мВт гача оширилиши кўзда тутилган.