Фарғона вилояти Қува туман шифохонаси жарроҳи Маҳмуд Бўронов Гулсанам Жабборова исмли аёл унга туҳмат қилаётгани юзасидан тегишли идораларга шикоят қилди. Ўтказилган тезкор тадбирда аёл ундан 1.5 млн сўм олаётганида қўлга олинди. Воқеа тафсилотлари “Ҳуқуқ” газетасида ёритилди.

Айтилишича, Жабборова келинини шифохонага олиб борган. У ерда келини жарроҳлик амалиётидан ўтказилган. Икки кундан сўнг беморнинг ҳолати ҳақида суҳбатлашаётиб, Жабборова Бўронов “учрашиб туриш”ни таклиф қилган. Аммо оилали эркак бу таклифни рад қилгани аёлга хуш келмаган. Натижада у товламачилик қилиб эркакни қўрқита бошлаган, унга тегажоғлик қилишда айблаган, бу ҳақда гап тарқатишини ва қаматиб юборишини айтиб таҳдид қилган.

Жумладан, туман ИИБга ариза ёзиб, сўнг яна қайтариб олган, Бўроновнинг таҳликага тушганини пайқаб, ундан “жим юриши” учун 1.5 млн сўм талаб қилган. Шунда шифокорнинг ўзи ИИБга ариза ёзишга мажбур бўлган.

Судда аёлнинг қилмишлари аниқланиб, Бўроновнинг номи оқланди.