Ливияда қўлга олинган “Механик Чеботарев” танкеридан озод қилинган россиялик матрос Павел Магатин Чеченистон пойтахти Грознийга етиб келди. Бу ҳақда Чеченистон президенти Рамзон Қодиров маълум қилди.  

“Павел Магатин Грознийга етказилди. У ўзини яхши ҳис қилмоқда. Бирор-бир тиббий ёрдамга эҳтиёж сезмаяпти. 13 октябрь, сешанба куни Павел Астраханда бўлади”, деб ёзди Қодиров инстаграмдаги саҳифасида.

Аввалроқ Магатин Чеченистон ҳукумати кўмагида озод қилингани маълум бўлганди. Хабарда, шунингдек, танкерда ошпаз бўлиб ишлаган Ключникова исмли аёл ҳам озод этилгани маълум қилинди.    

“Ливия ҳукумати билан музокаралар ўтказиш учун мен томондан Триполига Чеченистон раҳбари маслаҳатчиси, Россия Давлат думаси депутати Адам Делимханов юборилди. У Ливиянинг янги умумий конгресси раиси (президент) Нури Абусамоний билан учрашди ва менинг номамни етказди”, деб музокаралар тафсилотларини изоҳлаб берди Қодиров ва яқин орада танкер экипажининг қолган аъзолари ҳам озод этилишига умид билдирди.

Қодиров ушбу муносабат билан Ливия бош вазири Халифа ал-Ҳавволга ўз миннатдорчилигини билдирди.

Маълумот учун, танкер сентябрь ойи ўрталарида нефть контрабандасида айбланиб Ливия портида қўлга олинганди. Кема оператори экипаж ноқонуний ҳибсга олингани ва ҳеч қандай “ҳуфиёна” ташишлар билан шуғулланмаганини таъкидламоқда.