ИШИД гуруҳи томонидан тарқатилган видеолавҳада сафдошлари билан хайрлашиб, зирҳли транспортёрда ўзини портлатиб юборгани қайд қилинган Жаъфар ат-Тайёр исмли йигит қирғизистонлик ўзбек эканлиги аниқланди.

Видеода уни амакиси, Жалолобод вилоятининг Сўзоқ туманида истиқомат қилувчи Ҳамидулло Ботиров таниб қолди. Айтилишича, йигитнинг асл исми Бобур Исроилов бўлиб, у 21 ёшда эди.
“Бобур онасининг ўлимидан сўнг 1.5 йил менинг уйимда яшади. Опамнинг ўғли Бобур мактабни тугатганидан сўнг 2013 йил ноябрида Россияга ишлагани кетганди, охирги марта биз у билан ўтган йилнинг мартида қўнғироқлашдик, шундан сўнг у билан алоқа йўқ бўлди”, - деди эркак.

Илгарироқ Ўзбекистон МХХ вакили камикадзенинг шахсини аниқлашнинг ва Ўзбекистон фуқароси эканлигини тасдиқлашнинг имкони йўқлигини маълум қилган эди.
“У қўшни мамлакатлардан бирида меҳнат муҳожирлигида ёлланган бўлиши мумкин”, - тахмин қилганди у.