Буюк Британиядаги Serco компанияси Лондондан 7 нафар муҳожирни Манчестер шаҳрига ҳашаматли лимузин орқали олиб борганидан кейин бундан норози бўлган инглизлардан узр сўради.

Муҳожирлар қимматбаҳо лимузинда 330 километр масофани "сайр қилишгани" маҳаллий аҳолига ёқмаганди ва улар буни "исрофгарчилик" сифатида баҳолашганди.

"Бу транспорт воситаси сафарлар ва одамларни ташиш учун эмасди. Бу солиқ тўловчиларга ёқмаганини тўғри тушунамиз. Бу ҳолат учун узр сўраймиз", деб журналистларга жавоб қайтарган Serco компанияси раҳбари Женни Хэллидей.

Унинг айтишича, бу ташув давлат билан шартномани бажариш учун амалга оширилган.

Буюк Британия бош вазири Дэвид Кэмерон шу йилнинг сентябрида мамлакатга кейинги 5 йил давомида 20 минг нафар қочқин қабул қилинишини маълум қилганди.

Айни вақтда қиролликка олиб ўтувчи Евротуннелнинг Франциянинг Кале шаҳри ҳудудидаги оғзи олдида 5 минг нафардан ортиқ қочқин тўпланган.