Фарғона вилоятининг Лоғон қишлоғида содир этилган қотиллик маҳаллий аҳолини карахт қилиб қўйди. Суд очерки “Ҳуқуқ” мухбири томонидан эълон қилинди.
Айтилишича, жабрдийда оила 5 кишидан иборат бўлган. Оиланинг бошлиғи А. Мирзалиев жиноятдан икки ҳафта муқаддам мавсумий даромад учун Россиянинг Санкт-Петербург шаҳрига кетган.

Уйда унинг рафиқаси Мукаррамхон, фарзандлари Шоҳруҳ, Азизбек ва Гулниҳоллар қолган.
Бир куни уларнинг қишлоқдошлари, 23 ёшли Фарҳод Холбеков ва Абдурашид Исмоилов, шунингдек, 19 ёшли Аҳлиддин Абдулҳатовлар оила бошлиғи йўқлигидан фойдаланиб, талончилик содир этишга келишиб олишган.

Оиланинг катта фарзанди Шоҳруҳ далага кетганидан фойдаланиб Фарҳод қўшнисидан хабар олган бўлиб уларнинг уйига кириб борган ва Мукаррамхонни гапга тутиб турган. Бу пайти ҳовлига унинг шериклари кириб олган. Шунда Фарҳод Мукаррамхонни бўғиб, ҳушидан кеткизган. Орадан бироз вақт ўтиб, аёлнинг тириклигини кўрган қотил унинг бўйнига икки-уч марта пичоқ санчиб олган.

Воқеага гувоҳ бўлган 10 ёшли Азизбек ҳам чавақлаб ташланган. Митти Гулниҳол мўъжиза туфайли қотилларнинг эътиборидан четда қолиб кетган. Улар бир сейфни кўтариб уйларига йўл олишган. Даладан қайтиб келиб, уйидаги аҳволдан даҳшатга тушган Шоҳруҳ тезда қўни-қўшниларни оёққа кўтарган.

Синглисининг узуқ-юлуқ гапларидан содир бўлган ишларни тушуниб, милицияга мурожаат қилган. Қотиллар шу кечанинг ўзида қўлга олинган.
Арзимаган пул деб икки бегуноҳ инсоннинг жонига зомин бўлган уч ёш йигит узоқ муддатга қамалиб кетди.